Un pouco de Historia
Dende o século XIX, o movemento obreiro na Coruña promoveu multitude de iniciativas de caracter social, educativo e cultural.
Ateneos, centros sociais, bibliotecas, publicacións, escolas racionalistas, centros de formación de adultos, corais, grupos de teatro e poesía … espalláronse polos barrios da cidade ata seren cercenados pola sublevación fascista de 1936.
Unha desas iniciativas, a principios do século XX, foi a Biblioteca AURORA, promovida polo militante libertario Enrique Taboada, un dos obreiros detidos durante meses trala represión da folga xeral de maio de 1901.
Hoxe, no século XXI, recuperamos o seu nome, o seu espíritu de divulgación e coñecemento, a súa lembranza pero tamén o seu presente e o seu fururo, para a realización de actividades culturais e sociais a prol da formación e o lecer activo da clase traballadora coruñesa, na procura dun mundo máis xusto e igualitario.
Un dos principais proxectos do Ateneo Libertario AURORA é a posta en marcha da Biblioteca e Arquivo Obreiro AURORA cos fondos documentais e bibliográficos de diferentes entes confederais e de varios fondos particulares de militantes obreiros galegos.
Tralo proceso de catalogación e organización, contará con milleiros de documentos e libros vencellados ao movemento obreiro e as loitas populares, con especial atención ao anarcosindicalismo e o movemento libertario.
Espazo Web – Memoria Libertaria na Galiza
O Ateneo Libertario AURORA administra o espazo web memorialibertarianagaliza.org, creado en 2023 e concibido como un espazo virtual no que ir recollendo e publicando información a prol da recuperación, conservación e difusión da memoria histórica libertaria e a historia do movemento obreiro e as loitas populares desenvolvidas na Galiza ao longo dos anos.
Outros proxectos
- Artellar e acoller conferencias, xornadas, seminarios e cursos, así como exposicións, concertos, proxección, presentacións de libros…
- Crear espazos libres e autoxestionados para o desenvolvemento de actividades culturais e de lecer activo, participativo e alternativo.
- Xerar redes de colaboración e afinidade con outras iniciativas similares no barrio, na Coruña, na Galiza e no resto de mundo
- En definitiva, construirmos un espazo de autoxestión e apoio mútuo no camiño dunha sociedade libertaria
SOLICITUDE DE ALTA COMO SOCIA/O
MEMORIA LIBERTARIA NA GALIZA 